ناس كتير كانت بتسأل عن أهمية شهادة ال CMA والعائد المعنوي والمادي منها

بعض النقاط للإيضاح:

ال CMA شهاده وعامل من ضمن عوامل كتير تؤخذ في الاعتبار في حال التوظيف او الترقيه ومن العوامل دي:

الكفاءه – الخبره – متطلبات الوظيفه الجديده ومناسبتها للمتقدم سواء بالترقيه او بالتعيين – حتى الاخلاق الشخصيه تؤخذ بالاعتبار ، وعوامل كتير الموضوع مش مجرد الشهاده بس ، دي المعلومات اللي بتحصلها من الشهاده وكفائتك فيها بالاضافه للعوامل الخارجيه الاخري زي ما أشرت ، اللي قد يكون منها اعتبارات شخصيه بحته في التعيين والترقيه ، بعيده كل البعد عن الاخلاق المهنيه والامانه كالتعيين بالوساطه دون الكفاءه ، والتعيين للمعارف والاقارب ، ودي عوامل الشهاده ملهاش دخل بيها ولا تقدر تغير ظروفها ولكن احنا حنتكلم هنا عن الظروف المهنيه والاخلاقيه المتعارف عليها

فمبدئيا خلينا نتفق انه لا يؤخذ في الاعتبار بالشهاده وحدها ، بمعزل عن كفائتك في تحصيل العلم من الشهاده دي ، وكمان العوامل المحيطه الاخري ، زي الكفاءه زي الخبره زي الاخلاق الشخصيه الخ ، ووفقا لمدي مناسبتك لمتطلبات الوظيفه اللي مش ضروري تكون كبيره عليك ، في حالات كتير ممكن يكون العكس ، يكون مطلوب خبره قليله وتكون خبرتك اكبر بكتير فالناس تقلق منك ، من حيث مثلا المرتب والمزايا وخلافه ، او ان تكون خبرتك كبيره في شركات المقاولات والوظيفه مطلوبه لشركه في مجال اخر ، ومطلوب خبره من نفس المجال (بإختصار العوامل المضافه ممكن نحطلها سيناريوهات لا حصر لها)

المهم .. طب ايه وجه الاستفاده من الشهاده بموضوعيه وححاول اختصر ولعل كلامي يكون فيه نور وترويح وفائده لبعض العقول الحائره

اولا: لو بتتعين في وظيفه جديده وتساويت في كل العوامل الاخري مع خمسون متقدم اخر (على سبيل المثال حنفترض ان العوامل الاخري ثابته) وانت الوحيد اللي فيهم معاك الشهاده دي ، ونفترض كمان توافر مبدأ المهنيه في الاختيار ، يبقى اكيد اقتناءك للشهاده وتحصيلك للعلم منها حيكون ميزه كبييييييره جدا في اتخاذ القرار بالنسبه للناس اللي بتعين وحتسهل عليهم الموضوع تماما

نفس القصه بالنسبه للشخص اللي بيترقى لو كل العوامل الاخري ثابته (نفس تاريخ التعيين نفس المرتب نفس الكفاءه نفس الالتزام فرضا جدلاً) وفي حيره في اتخاذ القرار بين حضرتك وشخص اخر بنفس القسم ، برضه الشهاده بتاعتك حتخلي عندك ميزه مش موجوده عنده

ثانيا: الشهاده ممكن تخلقلك مكان عمل جديد او فرصه جديده ، النهارده وظائف كتيره وخاصة بدول الخليج العربي بتطلب شهادة ال CMA كمطلب مبدئي للتعين زي الكومبيوتر والانجليزي ويمكن اخرهم شهادة الجامعه ، ده في تقديري الناس ميهمهاش حضرتك خريج اسكندريه ولا القاهره ولا المنصوره ولا دمياط ، ممكن تفرق اذا كنت تجاره عربي ولا انجليزي علشان موضوع اللغه دي بتعبر اضافه …. وده سبب ادعي انك تحارب عشان تاخد الشهاده لتضيف لشهادة تخرجك العربي او على الاقل تقرب او تتساوي مع خريج تجاره انجليزي (دا طبعا يتوقف على مستوى قياس الشهاده بين الخريجين ودي معتقدش تتقاس بالارقام بشكل واضح) وكمان بتاع تجاره انجليزي برضه محتاجها عشان يضيف المعلومه ويعادل موضوع الخبره والكفاءه الخ …. المهم انت مؤهلاتك ايه زي ما قولت المتمثله في اللغه والكومبيوتر وشهاده مهنيه زي ال CMA تعتبر اضافه قويه جدا جدا في كتير من الدول وفي كتير من الشركات خاصة ال Multinational

نقطه تانيه في ثانيا: كمثال لخلق فرص اخري ممكن حضرتك تلم بالشهاده وعلومها بشكل متمكن وتقدر تشتغل انستركتور ليه لأ؟ دي كمان بعض الناس بالنسبالهم فرصه بديله تؤخذ بالاعتبار وزي ما بيقولوا career shift

ثالثا: بالنسبه للمستوى الشخصي في رأيي الشخصي المتواضع:

1- الشهاده حتغير كتير في طريقة تفكيرك في الشغل وبره الشغل ، مش الشهاده بقى لأ دا الدراسه والعلم اللي بتحصله من منهجها ، وده طبيعي ، بيحصل مرونه وتفتح في طريقة التفكير نتيجه للقراءه وتحصيل العلم ، والافكار كمان اللي بتقابلك وبتدرسها بتفتحلك افكار جديده حواليك في امور حياتك الطبيعيه والعاديه ، خصوصا لو ايدك في الدراسه على طول ومتابع اول باول (اقصد المخ على طول مصحصح ومتمرن وجاهز)

2- اكاد اجزم ان طريقة ردك على الناس ومناقشاتهم هيا كمان بتتغير ، نتيجه لتغير طريقة تفكيرك والمعلومات المضافه اليك

3- الشهاده كشهاده تضيف لحضرتك وزن اجتماعي له ثقله ، على سبيل المثال (وليس المقارنه او القياس الوزني) الحاصلين على الماجستير او الدكتوراه دي شهادات اكاديميه تضيف لمركزك وثقلك على المستوى الاجتماعي

قد يختلف او يتفق البعض معي في كل او بعض ما ذكرت ، ولكن هو مجرد رأي شخصي ، قد اصيب او أخطأ فيه لعل الله يكتب فيه الفائده والهدايه في التفكير والتخطيط لبعض الناس ، ويكون في البوست ده رد على تساؤلات واجهتني كثيرا من قبل

والله الموفق والمستعان