طريقة عمل ال  CV 😁

اولا: البيانات الشخصيه

  • طبعا من ضمن البيانات الصوره ويا ريت تكون حاجه واضحه ومركزه على وشك وتكون formal شويه مش لازم بدله وجرفته يعني بس على الاقل مش صورتك في مجموعه ولا حتي صوره سيلفي لانها بتكون باينه اوي او مثلا انك تكون قاعد عالبحر مينفعش طبعا  
  • بالنسبه للاسم يفضل يكون بخط كبير ويكون Bold عشان يبقي اول حاجه تقع عليها عين اللي بيقرا ال CV بتاعك
  • العنوان مش لازم يتكتب بالتفصيل اوي كفايه المنطقه والمدينه والمحافظه ومش ضروري تكتب اسم البلد الا يعني لو كنت بتقدم على وظيفه في بلد برا مصر مثلا لان اللي يهم الناس اللي بتوظف في العنوان انت عايش قريب من مكان العمل او لأ مش حيهتم اوي باسم الشارع ورقم البيت وهكذا
  • رقم التليفون وطبعا لو في كذا تليفون ما فيش مشكله تقدر تكتبهم كلهم ممكن تكتب كل رقم في سطر او تحط سلاش بينهم المهم التليفونات اللي حطحطها تكون متاح عليها وجاهز للرد لما يحصل اتصال من الشركه اللي بتوظفك ان شاء الله
  • تاريخ الميلاد وهنا حاول تكتبه الشهر بالحروف مش بالارقام حتي لو حروف اختصار
  • الاميل وطبعا يفضل يكون الاميل شكله بروفيشنال مش يكون معمول بإسم دلع مثلا او اسم ملهوش علاقه بيك يعني يفضل يكون الاميل باسمك الاول او اول حرف منه واسم الاب او العيله بعد كده وهكذا
  • يا سلام لو عندك حساب على linkedin ويكون معمول بصوره شخصيه رسميه الي حد ما ويكون البروفايل معمول بشكل احترافي متكامل عشان لو كده تحط اللينك بتاعه تحت اميلك بحيث يبقي اسهل للناس انها تخش على الاكونت وتشوف بيانات اكتر عنك لو حبوا

ثانيا: التعليم

  • وطبيعي بعد كده تحط التعليم انت خريج ايه ودخلت سنة كام واتخرجت سنة كام (ولو لسه طالب طبعا حتكتب till now) كلية ايه جامعة ايه قسم ايه ان وجد وهكذا ولو حديث تخرج ما فيش مانع تحط تقديرك لو كان اكتر من مقبول بحيث انه يعزز ال CV بتاعك ولو في ماجستير او دكتوراه طبعا ينكتب في ال CV لان الدراسات الاكاديميه العليا اكيد حتضيف كتير لل CV

ثالثا: خبرات العمل

  • الخبرات في سوق العمل ال Work Experience ودي يا ريت تكتب من الاحدث للاقدم بحيث يكون اول حاجه يقراها ال HR  هيا اخر شغلانه اشتغلتها او احدثهم يعني بتكتب اسم الشركه واشتغلت من الفتره من كذا لكذا والمسمي الوظيفي في كل شركه ولو نبذه مختصره عن طبيعة شغلك في الشركه دي او لو كنت حققت انجازات تضاف ليك او ساهمت في نقله الشركه من مكان لمكان افضل وهكذا
  • وطبعا لو في اي اعمال تطوعيه كنت قمت بيها تكتبها تكتب اسم المؤسسه وطبيعتها والمهام اللي بتقوم بيها والفتره اللي عملت فيها داخل هذه المؤسسه ونبذه مختصره برضه عن العمل التطوعي اللي قومت بيه ويا سلام لو ليه علاقه بالوظيفه اللي بتقدم فيها دا اكيد حيعزز موقفك جدا ان شاء الله

رابعا: الكورسات:

  • الكورسات والمنح:

بالنسبه للمنح لو كذا منحه اكتبهم ورا بعض برضه من الاحدث للاقدم بتوارخيها والجهات المانحه والبرامج موضوع كل منحه

بالنسبه للكورسات برضه اكتبهم من الاحدث للاقدم ويفضل تكتب بس الكورسات اللي ليها علاقه تقنيه بالشغلانه اللي متقدم لها اكتب تاريخ الكورس من الي والجهه اللي درست فيها او حصلت على شهاده منها حتي لو كانت كورسات self-study تقدر تضيفها ولو في اي شهادات تقدر ترفقها مع ال CV بتاعك

خامسا: المهارات الشخصيه

  • ودي حاجات زي ما تتعلق بالكومبيوتر واللغه ومستواك فيهم ايه واسم البرامج اللي تقدر تتعامل معاها ولو في تحديد لمستوي معين تقدر تنوه عنه يعني ممتاز في كذا وجيد جدا في التعامل مع كذا وهكذا
  • بالنسبه للغه ما فيش مانع انك توضح ان اللغه الام كذا وان اول لغه اجنبيه كذا ومستوايا فيها كذا وتاني لغه اجنبيه وهكذا

سادسا: الهوايات والاهتمامات الشخصيه

  • ودي يفضل لو كانت برضه مهارات ليها علاقه تقنيه بعملك زي مثلا القراءه وكتابة الخواطر ان وجد وهكذا واعمل حسابك ان حتي دي ممكن ال HR يناقشك فيها زي انه يسألك عن اخر كتاب قريته او اسماء الكتاب المفضلين لديك وهكذا

سابعا: نصائح عامه

  • راجع ال CV كويس اوي واتأكد انه يخلو من اي اخطاء املائيه
  • حاول متحطش frame لل CV بتاعك
  • الفونت بين 11 و 14 ويا سلام لو times new roman عشان شكله formal شويه
  • خلي اسامي الشركات اللي اشتغلت فيها والكورسات اللي خدتها وهكذا بال bold
  • لو حتبعت ال CV باميل يفضل تبعته بفورمات PDF
  • طبعا يفضل الاعتماد في format ال CV انه يكون بالشكل ال modern لانه بيميز ال CV من حيث الشكل والاولوان وهكذا والنهارده احنا عارفين ان ال visualization اصبح من اهم الامور اللي بتثبت المعلومه وتخليها تعلق في الدماغ واحنا عاوزين ال CV يعلق في ذهن الناس اللي بتقراه ويعلم معاها
  • طبعا دي نصائح عامه ناخدها في الحسبان محدش قال ان في كتاب اسمه CV standards فيه معايير كلنا لازم نلتزم بيها ابدا absolutely دي مجرد نصايح ومجربه وعن قناعه ولك انك تاخد منها ما يناسبك وتتجاهل ما لا ترتاح اليه وتعدل وتشيل وتضيف من شخصيتك وهكذا المهم ان كل كلمه او معلومه تكتبها في ال CV تكون يتعنيها اوي ومدركها جدا وجاهز كمان للنقاش فيها اذا لزم الامر

ودي مئات من ال free modern CV من علي موقع Canva شخصيا

وده موقعك يساعدك تبني ال CV بتاعك في صورة templates professional ويشرحلك كمان خطوات اعداد ال CV

وده ابليكشن علي ال google play يساعدك تبني ال modern CV بتاعك فيه اكتر من 100 نموذج وبيشتغل معاك خطوه بخطوه وتقدر منه تعمل download PDF او send by email

وده ابليكشن تاني برضه حلو جدا

طبعا المواقع والابليكشن كتير جدا دي امثله شوفها ودور وشوف كمان غيرها لحد ما توصل لحاجه تستريحلها ابني بيها ال cv بتاعك واحتفظ بيه عندك وعدل عليه عند الحاجه لاي تعديل وبالتوفيق دايما ان شاء الله

Spread the love